யாழில் இராணுவத்தினரின் உதவியோடு சமையல் எரிவாயு விநியோகிக்கப்படுவதாக எழுந்த செய்திகள் தவறானவை!

யாழ்ப்பாணத்தில் சமையல் எரிவாயு சிலிண்டர்களை இராணுவத்தினரின் உதவியுடன் விநியோகிக்க நடவடிக்கை எடுக்கப்படுவதாக, யாழ்.மாவட்டச் செயலக வட்டாரங்களைச் சுட்டிக்காட்டி வெளியாக செய்தியை, மாவட்டச் செயலாளர் க.மகேசன் மறுத்துள்ளார்.
இது தொடர்பில் யாழ்.மாவட்டச் செயலாளர் விடுத்துள்ள ஊடக மறுப்பறிக்கையிலேயே இவ்வாறு குறிப்பிடப்பட்டுள்ளது.
27.05.2022 திகதியன்று சில அச்சு மற்றும் இலத்திரனியல் ஊடகங்களில் வெளியிடப்பட்ட ‘எரிவாயு சிலிண்டர்களை இராணுவத்தினரின் உதவியுடன் விநியோகிக்க நடவடிக்கை’ என்ற தலைப்பிலான செய்தியிலே ‘எரிவாயு விநியோகஸ்தர்களால் இடையூறு ஏற்படுத்தப்படும் என்பதனால் இராணுவத்தினரின் உதவியினைப் பெற ஆலோசிக்கப்படுவதாக’ தெரிவிக்கப்படும் கூற்றில் எவ்வித உண்மைத்தன்மையும் இல்லை
என்பதுடன் அது தவறான செய்தியாகும்.
யாழ்ப்பாண மாவட்டத்தில் எரிவாயு விநியோகஸ்தர்கள் யாழ்ப்பாண மாவட்ட செயலகத்துடன் இணங்கி செயற்படுவதற்கும், விநியோக நடவடிக்கைகளுக்கு ஒத்துழைப்பு வழங்கவும் தங்களது இணக்கப்பாட்டை 25.05.2022 ஆம் திகதியன்று மாவட்ட செயலகத்தில் இடம்பெற்ற பிரதேச செயலாளர்களுடான கலந்துரையாடலில் தெரிவித்;தனர் என்பதனையும், மாவட்ட செயலகத்துடன் எரிவாயு விநியோகஸ்தர்கள் ஒத்துழைத்து செயற்பட்டு வருகின்றனர் என்பதனையும் மாவட்ட செயலகம் தெரிவித்துக்கொள்கின்றது என அறிக்கையில் குறிப்பிடப்பட்டுள்ளது.