தமிழ்த் தேசியக் கூட்டமைப்பில் இருந்து வெளியேறி எதிர்வரும் உள்ளூராட்சிச் சபைத் தேர்தலில் தனித்துப் போட்டியிடுவதற்கு இலங்கை தமிழரசுக் கட்சி தீர்மானித்துள்ளது.
கூட்டமைப்பின் ஏனைய பங்காளிக் கட்சிகளான ரெலோ, புளொட் ஆகியன, தொடர்ந்தும் சேர்ந்து போட்டியிடுவதா அல்லது தாமும் தனித்தனியாகவே போட்டியிடுவதா என்பது குறித்து அந்தந்தக் கட்சிகள் தமக்குள் பேசித் தீர்மானம் எடுப்பர் என்றும்முடிவாகியுள்ளது.
கொழும்பில் உள்ள தமிழ்த் தேசியக் கூட்டமைப்பின் தலைவர் இரா. சம்பந்தனின் இல்லத்தில் இன்று காலை இடம்பெற்ற கூட்டமைப்பு பங்காளிக் கட்சிகளின் கலந்துரையாடலின் போதே தமிழரசுக் கட்சி தனது இந்தத் தீர்மானத்தினை அறிவித்தது.
இந்த கலந்துரையாடலில் – கூட்டமைப்பின் தலைவர் இரா.சம்பந்தன், தமிழரசுக் கட்சியின் சார்பில் தலைவர் மாவை சேனாதிராசா, எம்.ஏ. சுமந்திரன், ரெலோ சார்பில் அதன் தலைவர் செல்வம் அடைக்கலநாதன், கோவிந்தன் கருணாகரம், ஹென்றி மகேந்திரன், புளொட் சார்பில் நல்லநாதர் ராகவன் ஆகியோர் பங்கேற்றிருந்தனர். உடல் நலமின்மை காரணமாக தர்மலிங்கம் சித்தார்த்தன் இந்த கலந்துரையாடலில் பங்கேற்க முடியவில்லை.
இதன்போது – நடைபெறவுள்ள உள்ளூராட்சி சபைத் தேர்தலில் எவ்வாறு போட்டியிடுவது என்பது தொடர்பில் நீண்ட நேரம் விவாதிக்கப்பட்டது.
குறிப்பாக – கூட்டமைப்பு பங்காளிக் கட்சிகள் தனித்து போட்டியிடுவதா அல்லது கூட்டமைப்புக்கு வெளியிலுள்ள தமிழ்க் கட்சிகளையும் இணைத்துக் கொண்டு பரந்துபட்ட கூட்டமைப்பாகப் போட்டியிடுவதா என்பன தொடர்பில் பேசப்பட்டது.
கடந்த தேர்தலை எதிர்கொண்டதைப் போல எதிர்கொள்ளலாம் என ரெலோ முன்மொழிந்துள்ளது.
எனினும், கடந்த முறை தமக்கு உறுதியளிக்கப்பட்ட சபைகள் தேர்தல் வெற்றியின் பின்னர் வழங்கப்படாததால், அது பற்றி மீளப் பேசப்பட வேண்டும் என புளொட் தெரிவித்துள்ளது.
எனினும், தேர்தல் நெருங்கிவிட்டதால், அதைபற்றி பேச அவகாசமில்லையென தமிழரசுக் கட்சி தெரிவித்துள்ளது.
இறுதியில் – எவ்வாறாயினும் தாம் தனித்தே போட்டியிடப் போவதாகத் தமிழரசு கட்சி தீர்மானம் எடுத்துத் தெரிவித்துள்ளது.
இந்த நிலையில் – கூட்டமைப்பின் ஏனைய பங்காளிக் கட்சிகளான ரெலோ, புளொட் ஆகியன, தொடர்ந்தும் தாம் சேர்ந்து போட்டியிடுவதா அல்லது தாமும் தனித்தனியாகவே போட்டியிடுவதா என்பது குறித்து தமக்குள் பேசித் தீர்மானம் எடுப்பர் என்றும்முடிவாகியுள்ளது.
அத்துடன் – ‘தமிழ்த் தேசியக் கூட்டமைப்பு’ என்ற பெயரைப் பயன்படுத்தி உள்ளூராட்சி சபைத் தேர்தலில் எவரும் போட்டியிடுவதில்லை என்றும் இன்றைய கூட்டத்தில் முடிவெடுக்கப்பட்டதாக தமிழரசு கட்சி சார்பில் தெரிவிக்கப்பட்ட போதிலும், அவ்வாறான் எந்த விடயமும் பேசப்படவே இல்லை என செல்வம் அடைக்கலநாதன் தெரிவித்தார்.
2001ஆம் ஆம் ஆண்டு, தமிழீழ விடுதலைப் புலிகளின் ஏற்பாட்டில் தமிழ் தேசிய கூட்டமைப்பு உருவாக்கப்பட்டபோது, இலங்கைத் தமிழரசுக் கட்சி அதில் அங்கம் வகிக்கவில்லை. தமிழர் விடுதலைக் கூட்டணியே அதில் இடம்பெற்றிருந்தது.
பின்னர் – 2004 ஆம் ஆண்டு, தமிழீழ விடுதலைப் புலிகளின் தலைவர் வேலுப்பிள்ளை பிரபாகரனின் வழிகாட்டலுக்கு அமையவே – இலங்கை தமிழரசுக் கட்சி கூட்டமைப்பின் ஒரு பங்காளிக் கட்சியாக உள்வாங்கப்பட்டது என்பது குறிப்பிடத்தக்கது.
தமிழ் தேசிய கூட்டமைப்பு உருவாக்கப்பட்ட காலத்திலிருந்து அதில் அங்கம் வகித்து வரும் ஒரே கட்சி ரெலோ என்பதும் குறிப்பிடத்தக்கது.
