மட்டக்களப்பு மாவட்டத்தில் சட்ட விரோத கசிப்பு உற்பத்தி செய்த மற்றும் விற்பனை செய்த 10பேர் இரு தினங்களில் கைதுசெய்யப்பட்டுள்ளதாக மட்டக்களப்பு மாவட்ட மதுவரித்திணைக்கள பொறுப்பதிகாரி நியூட்டன் அவுஸ்கோன் தெரிவித்தார்.
நேற்று, நேற்று முன்தினமும் வெல்லாவெளி,கிரான்,வாழைச்சேனை ஆகிய பிரதேச செயலாளர் பிரிவுகளில் தொடர்ச்சியான சோதனை நடவடிக்கைகள் முன்னெடுக்கப்பட்டன.
இதன்போது வெல்லாவெளி பிரதேச செயலாளர் பிரிவுகளில் இரண்டு இடங்களில் கசிப்பு உற்பத்தி நிலையங்கள் முற்றுகையிடப்பட்டதுடன் அங்கிருந்து பெருமளவு கோடா மீட்கப்பட்டு அழிக்கப்பட்டதாக மட்டக்களப்பு மாவட்ட மதுவரித்திணைக்களம் தெரிவித்தது.
சுற்றிவளைப்புக்களில் சட்ட விரோதமதுபான விற்பனையில் ஈடுபட்டிருந்த 08பேர் கைதுசெய்யப்பட்டு பிணையில் விடுவிக்கப்பட்டுள்ளதுடன் அவர்களுக்கு எதிராக நீதிமன்றில் வழக்கு தாக்கல் செய்யவுள்ளதாகவும் மட்டக்களப்பு மாவட்ட மதுவரித்திணைக்கள பொறுப்பதிகாரி நியூட்டன் அவுஸ்கோன் தெரிவித்தார்.
கிழக்கு மாகாண உதவி மதுவரி ஆணையார் ஏ.தர்மசீலன் ஆலோசனைக்கு அமைவாக மட்டக்களப்பு மாவட்ட மதுவரி அத்தியட்சகர் எஸ்.ரஞ்சனின் தலைமையில் இந்த நடவடிக்கைகள் முன்னெடுக்கப்படுகின்றன.
மட்டக்களப்பு மாவட்டத்தின் 14பிரதேச செயலாளர் பிரிவுகளிலும் இது தொடர்பான சோதனை நடவடிக்கைகள் முன்னெடுக்கப்பட்டுவருவதாக மட்டக்களப்பு மாவட்ட மதுவரித்திணைக்கள பொறுப்பதிகாரி தெரிவித்தார்.
