ஆஷஸ் தொடரின் முதலாவது டெஸ்ட் போட்டி பர்மிங்காமில் ஆரம்பமாகி இடம்பெற்று வருகின்றது.
நாணய சுழற்சியில் வென்ற இங்கிலாந்து அணி துடுப்பாட தீர்மானித்தது. அதன்படி, முதலில் துடுப்பெடுத்தாடிய இங்கிலாந்து அணி 78 ஓவரில் 8 விக்கெட்டுக்கு 393 ஓட்டங்கள் குவித்தது.
ஜோ ரூட் பொறுப்புடன் ஆடி சதமடித்து அசத்தினார். அவர் 118 ஓட்டத்துடன் ஆட்டமிழக்காமல் உள்ளார். பேர்ஸ்டோவ் 78 ஓட்டங்களும், சாக் கிராலி 61 ஓட்டங்களும் எடுத்தனர்.
அவுஸ்திரேலிய அணி சார்பில் நாதன் லயன் 4 விக்கெட்டும், ஹசில்வுட் 2 விக்கெட்டும் வீழ்த்தினர்.
இதையடுத்து, முதல் இன்னிங்சை தொடங்கிய அவுஸ்திரேலியா முதல் நாள் முடிவில் 14 ஓட்டங்கள் எடுத்தது. இந்நிலையில், இரண்டாம் நாள் போட்டி நேற்று நடைபெற்றது.
டேவிட் வார்னர் 9 ஓட்டத்தில் அவுட்டானார். லாபுசேன் டக் அவுட்டாகி அதிர்ச்சி அளித்தார். ஸ்மித் 16 ஓட்டத்தில் வெளியேறினார்.
மற்றொரு தொடக்க ஆட்டக்காரரான உஸ்மான் கவாஜா பொறுப்புடன் துடுப்பாடி சதமடித்தார். 4-வது விக்கெட்டுக்கு இணைந்த கவாஜா- டிராவிஸ் ஹெட் ஜோடி 81 ஓட்டங்கள் சேர்த்த நிலையில், ஹெட் 50 ஓட்டத்தில் ஆட்டமிழந்தார். கிரீன் 38 ஓட்டத்தில் வெளியேறினார்.
இறுதியில், இரண்டாம் நாள் முடிவில் அவுஸ்திரேலியா 5 விக்கெட் இழப்புக்கு 311 ஓட்டங்கள் எடுத்துள்ளது. கவாஜா 126 ஓட்டமும், அலெக்ஸ் கேரி 52 ஓட்டமும் எடுத்து ஆட்டமிழக்காமல் உள்ளனர். இங்கிலாந்து சார்பில் ஸ்டூவர்ட் பிராட், மொயீன் அலி தலா 2 விக்கெட் வீழ்த்தினர்.
