மேற்கு இந்திய தீவுகள் அணிக்கு எதிரான முதல் ரி – 20 போட்டியில் 49 ஓட்டங்கள் வித்தியாசத்தில் இந்திய அணி வெற்றி பெற்றது.
மேற்கு இந்திய தீவுகள் மகளிர் கிரிக்கெட் அணி இந்தியாவில் சுற்றுப்பயணம் மேற்கொண்டு 3 ரி – 20 மற்றும் 3 ஒருநாள் போட்டிகள் கொண்ட தொடரில் விளையாடி வருகிறது. இதில் முதலில் ரி – 20 போட்டிகள் நடைபெறுகின்றன.
இரு அணிகளுக்கும் இடையிலான முதல் ரி – 20 போட்டியில் நடைபெற்றது. இந்த ஆட்டத்துக்கான நாணயச்சுழற்சியில் வென்ற மேற்கு இந்திய தீவுகள் அணி களத்தடுப்பை தெரிவு செய்தது.
இதையடுத்து இந்தியாவின் தொடக்க வீராங்கனைகளான ஸ்மிருதி மந்தனா மற்றும் உமா செத்ரி ஆகியோர் களமிறங்கினர்.
இதில் உமா செத்ரி 24 ஓட்டங்களிலும், ஸ்மிருதி மந்தனா அரைச்சதம் அடித்த நிலையில் 54 ஓட்டங்களிலும் ஆட்டமிழந்தனர். தொடர்ந்து ஜெமிமா ரோட்ரிக்ஸ் மற்றும் ரிச்சா கோஷ் ஆகியோர் ஜோடி சேர்ந்தனர்.
இருவரும் அதிரடியாக ஆடி ஓட்டங்கள் சேர்த்தனர்.இதில் ரிச்சா கோஷ் 20 ஆட்டமிழந்தார். தொடர்ந்து ஹர்மன்ப்ரீத் கவுர் களம் புகுந்தார். மறுமுனையில் அதிரடியாக ஆடிய ரோட்ரிக்ஸ் அரைச்சதம் அடித்து அசத்தினார்.
இறுதியில் இந்திய அணி 20 ஓவர்களில் 4 விக்கெட்கள் மட்டும் இழந்து 195 ஓட்டங்கள் குவித்தது. இந்தியா தரப்பில் அதிகபட்சமாக ஜெமிமா ரோட்ரிக்ஸ் 73 ஓட்டங்கள் எடுத்தார்.
மேற்கு இந்திய தீவுகள் தரப்பில் கரிஷ்மா ராம்ஹராக் 2 விக்கெட்கள் வீழ்த்தினார். இதையடுத்து 196 ஓட்டங்கள் எடுத்தால் வெற்றி என்ற இலக்குடன் மேற்கு இந்திய தீவுகள் அணி விளையாடியது .
தொடக்கம் முதல் இந்திய அணியின் பந்துவீச்சை சமாளிக்க முடியாமல் மேற்கு இந்திய தீவுகள் அணி தடுமாறியது. அந்த அணி 20 ஓவர்கள் முடிவில் 7 விக்கெட்கள் இழப்புக்கு 146 ஓட்டங்கள் மட்டுமே எடுத்தது.
இதனால் 49 ஓட்டங்கள் வித்தியாசத்தில் இந்திய அணி வெற்றி பெற்றது. இந்த வெற்றியால் 3 போட்டிகள் கொண்ட ரி – 20 தொடரில் 1 – 0 என இந்திய அணி முன்னிலை பெற்றுள்ளது.
