அவர் முதல் தடவையாக விமானத்தில் பயணம் செய்வதற்காக விமானத்தில் ஏறியிருந்தார்.
அவருக்கு மகிழ்ச்சி எல்லை கடந்திருந்தது.
விமானத்தில் ஏறியதும் தனக்கு பிடித்தமான ஓர் ஆசனத்தில் அமர்ந்துகொண்டார்.
விமானப் பணிப்பெண் வந்து அவருக்கு ஒதுக்கப்பட்ட ஆசனத்தைக் காட்டி அதில் அமருமாறு கேட்டார்.
ஆனால், அவரோ எவ்வளவு சொல்லியும் தகராறு பண்ணிக்கொண்டே இருந்தார்.
விமானம் கேரளாவின் கொச்சி விமான நிலையத்திலிருந்து புதுடில்லிக்கு செல்லவிருந்தது.
விமானப் பணிப்பெண் வேறுவழியில்லாமல் விடயத்தை அந்த விமானத்தின் விமானியிடம் சென்று முறையிட்டார்.
விமானி நேராக அந்த பயணியிடம் வந்து நீங்கள் எங்கே போகிறீர்கள்? என்று கேட்க, அவர் சொன்னார் ‘டில்லிக்கு’ என்று.
உடனே அந்த விமானி, ‘இந்த ஆசனம் சென்னைக்கு போகின்றது.
டில்லிக்கு போவதெனில் அந்த ஆசனத்தில்தான் (அவருக்கு ஒதுக்கப்பட்டதைக் காட்டி) போகவேண்டும்’ என்றார்.
உடனே அந்த பயணி ஓடிச்சென்று அந்த ஆசனத்தில் அமர்ந்துகொண்டார்.
சிலர் கதைக்கின்ற சில விடயங்களைக் கேட்கின்றபோது இந்தக் கதையும் அந்த பயணியும்தான் ஞாபகத்துக்கு வருகின்றனர்.
இப்போது யாரை சந்தித்தாலும் அவர்கள் முதலில் பேசத் தொடங்குவது இந்த உயிர்த்த ஞாயிறு தாக்குதல் தொடர்பாக சனல் – 4 வெளியிட்ட ஆவணப்
படம் பற்றியதுதான்.
அதில், முக்கிய பாத்திரத்தில் பங்குகொண்டவர் பிள்ளையானின் நெருங்கிய சகாவாக இரண்டு தசாப்தங்களுக்கு மேலாக அவருடன் இருந்த அசாத் மௌலானாதான்.
அவர் பிள்ளையான் பற்றி பல விடயங்களைக் கூறியிருந்தாலும் அவை ஒன்றும் நமக்கு புதிய விடயங்கள் அல்ல.
பிள்ளையான் பற்றி ஏற்கனவே அறிந்த விடயங்கள் தான்.
பிள்ளையான் ஓர் அப்பாவி என்றோ அல்லது கறைபடியாத உத்தமர் என்றோ யாரும் இங்கே வாதிடப்போவதில்லை.
ஆனால், அவர் செய்தவை என்று பட்டியலிடப்பட்ட அத்தனை சம்பவங்களிலும் பங்குகொண்டவர் இந்த அசாத் மௌலானா.
அவரை இப்போது சிலர் ‘கொண்டாடுகின்ற’ போதுதான் உறுத்தல் ஏற்படுகின்றது.
அந்த காணொலியை பார்த்த ஒரு முன்னாள் போராளி கேட்டார், ‘இத்தனை பெரிய வேலையைச் செய்வதற்கு திட்டமிடுகின்றவர்கள் அசாத் மௌலானா போன்ற ஒருவரை பயன்படுத்துகின்ற அளவுக்கு முட்டாள்களாக இருப்பார்களா?’ என்று.
அதை விட அவ்வாறு இலங்கையின் இராணுவ புலனாய்வு பணிப்பாளர் அதற்கு திட்டமிட்டிருந்தால் புத்தளத்திலுள்ள சஹ்ரானின் இடத்துக்கு சென்று சந்தித்தார்
என்பதை நம்பிக்கொண்டு அந்தக் காணொலி பற்றி பேசுவதும் நகைப்புக்கு இடமானது என்கிறார்.
நாம் இங்கே இப்படி எழுதுவதால் உயிர்த்த ஞாயிறு தாக்குதலில் யாரும் சம்பந்தப்படவில்லை என்றோ அல்லது தேர்தல் வெற்றிக்காக இப்படியெல்லாம் செய்ய மாட்டார்கள் என்றோ அல்ல.
இந்தக் காணொலியில் சொல்லப்படுகின்ற விடயங்கள் உண்மையானவையா என்ற சந்தேகத்தையே இங்கே கிளப்ப வேண்டியிருக்கின்றது.
அதுபற்றிய சந்தேகங்களுக்கு அப்பால் இன்று இந்தப் பத்தியில் நாம் சொல்ல வருவது, இந்தக் காணொலி வெளிவந்த பின்னர் பலரும் குறிப்பாக
இன்றைய எதிர்க்கட்சியில் இருக்கும் பலரும் அதுபற்றி குரல் எழுப்பி வருகின்றனர்.
அவர்களில் பலர் தாக்குதல் நடந்ததும் சஹ்ரான் இலங்கை இராணுவத்திடம் சம்பளம் பெற்றாரென தொடர்ந்து குற்றம்சாட்டி வந்தவர்கள்.
யுத்தம் நடைபெற்ற காலத்தில் தமக்கு தகவல் வழங்குகின்றவர்கள் பலர் தமது கொடுப்பனவு பட்டியலில் இருந்தார்கள் என்றும் அதுபற்றிய விவரங்களை வெளியிடுவது தேசிய பாதுகாப்புக்குப் பாதகமானது என்றும் பாதுகாப்பு தரப்பில் விளக்கமளிக்கப்பட்டு வந்தது.
சஹ்ரானுக்கு இலங்கை இராணுவ உளவுத்துறையினர் சம்பளம் கொடுத்து வளர்த்து வந்தனர் என்று குற்றஞ்சாட்டியவர்கள்தான், இப்போது சனல் 4இன் ஆவணப்படத்தை காட்டி முழுமையான விசாரணை நடத்த வேண்டும் என்கின்றனர்.
ஆக, இராணுவத்தின் உளவுப்பிரிவின் சம்பளப் பட்டியலில் இருந்த ஒருவரை பிள்ளையானின் உதவியாளர் அசாத் மௌலானா உளவுத்துறையின் இயக்குநருக்கு அறிமுகம் செய்து வைத்ததாகக் கூறுவதை எதற்காக தூக்கிப்பிடிக்கின்றனர் என்பது தெரியவில்லை.
அவர் சொல்வது சரி எனில், இவர்கள் முதலில் சொன்னது பிழையா என்று கேட்காமல் இருக்க முடியவில்லை.
- ஊர்க்குருவி.
