ஹாஸாவில், பலஸ்தீனியர்களை இஸ்ரேலிய இராணுவம் திட்டமிட்டு கொலை செய்ததாகவும், பாலியல் வன்கொடுமை உள்ளிட்ட மனிதத் தன்மையற்ற சித்திரவதைகளில் ஈடுபட்டதாகவும், ஐக்கிய நாடுகள் சபையின் விசாரணைக்குழு தெரிவித்துள்ளது.
இது தொடர்பில், அறிக்கை வெளியிடப்பட்டுள்ளது.
இஸ்ரேல் – ஹமாஸ் மோதல் தொடர்பாக, மனித உரிமைகள் ஆணைக்குழுவின் முன்னாள் தலைவர் நவநீதம்பிள்ளை தலைமையில், உயர் மட்டக் குழு விசாரணை மேற்கொண்டது.
ஹாஸாவில் உள்ள பலஸ்தீனியர்களை முற்றாக கொன்றழிக்க, இஸ்ரேல் முயன்றதாக, அறிக்கையில் குற்றம் சாட்டப்பட்டுள்ளது.இஸ்ரேலிய இராணுவத்தினர், ஹாஸா பெண்களை பாலியல் சித்திரவதை செய்ததுடன், பலஸ்தீனிய ஆண்கள் மற்றும் இளைஞர்களை பாலின ரீதியாக துன்புறுத்தியுள்ளனர் எனவும், தலைகளை துண்டித்தல், உடல் உறுப்புகளை துண்டித்தல், நிர்வாணப்படுத்துதல் மற்றும் இறந்தோரின் உடல்களுக்கு அவமரியாதை செய்தல், எரித்தல் போன்ற செயல்களில் இஸ்ரேல் இராணுவம் ஈடுபட்டது எனவும், அறிக்கையில் குறிப்பிடப்பட்டுள்ளது.
சர்வதேச மனிதாபிமான சட்டங்கள் மற்றும் சர்வதேச மனித உரிமைச் சட்டங்களை மீறியதோடு, இஸ்ரேல் இராணுவம், போர்க்குற்றம் புரிந்துள்ளதாகவும், ஐக்கிய நாடுகள் சபையின் விசாரணைக்குழு தெரிவித்துள்ளது.
ஹமாஸ் இயக்கத்தினரும் போர் குற்றம் புரிந்ததாக குற்றம் சாட்டியுள்ள விசாரணைக் குழு, தனது அறிக்கையை, அடுத்த வாரம், மனித உரிமை ஆணைக்குழுவில் சமர்ப்பிக்கவுள்ளது.
