எதிர்வரும் ஜனாதிபதித் தேர்தலில் போட்டியிடும் வேட்பாளர்களின் சொத்து விபரங்கள் கையூட்டல் மற்றும் ஊழல் விசாரணைகள் ஆணைக்குழுவினால் வெளியிடப்பட்டுள்ளது.
இலஞ்சம் அல்லது ஊழல் குற்றச்சாட்டுகளை விசாரிப்பதற்கான ஆணைக்குழு (CIABOC) ஜனாதிபதி வேட்பாளர்களின் சொத்துப் பிரகடனங்களை இப்போது அதன் உத்தியோகபூர்வ இணையத்தளத்தில் https://ads.ciaboc.lk/profiles/16 பொதுமக்கள் பார்வையிட முடியும் என அறிவித்துள்ளது.
ஊழல் விசாரணை சட்டத்தின் 88 இன்று 1 ஆம் பிரிவின் படி, ஒவ்வொரு வேட்பாளர்களின் சொத்துக்களையும் கடன்களையும் மாத்திரமே வெளியிட முடியும் என ஆணைக்குழுத் தமது உத்தியோகபூர்வ இணையத்தளத்தில் தெரிவித்துள்ளது.
01.ரணில் விக்ரமசிங்கவின் சொத்து விபரங்கள்
எதிர்வரும் ஜனாதிபதித் தேர்தலில் சுயேட்சை வேட்பாளராகப் போட்டியிடும் தற்போதைய ஜனாதிபதி ரணில் விக்ரமசிங்கவின் மாதாந்த வேதனம் 97 ஆயிரத்து 500 ரூபாவாகும். அவரது வேதனம் தவிர்ந்த கொடுப்பனவுகளாக 82 ஆயிரத்து 191 ரூபாய் 66 சதம் என அவரது சொத்து விபரத்தில் காட்டப்பட்டுள்ளது.
களனி பல்கலைக்கழகத்தில் பேராசிரியராகப் பணிபுரியும் அவரது மனைவியின் மாதாந்த வேதனம் ஜந்து இலட்சத்து 76 ஆயிரத்து 785 ரூபாய் 50 சதமாகும். இரத்தினங்கள் மற்றும் ஆபரணத் துறையில் பணத்தை முதலீடு செய்தள்ளதுடன் ஆபரணங்களின் பெறுமதி 6 இலட்சத்து 65 ஆயிரம் ரூபாயெனக் குறிப்பிடப்பட்டுள்ளது.
ஜனாதிபதியின் மனைவி அவரது தாயிடமிருந்து பெற்ற 39 இலட்சம் ரூபாய் பெறுமதியான பல நகைகளை வைத்துள்ளதாக ஜனாதிபதியின் சொத்து விபர அறிக்கையில் குறிப்பிடப்பட்டுள்ளது.
குருநாகல்- மல்பொக்குனாவத்தையில் காணி, கொழும்பு 7 இல் தற்போது அவரது வீடு, நாவல வீதியில் உள்ள அவரது வீடு மற்றும் காணியின் சொத்து விபர அறிக்கையில் சுட்டிக்காட்டப்பட்டுள்ளது.
ஜனாதிபதியிடம் உள்ள ஜீப் ரக வாகனம் ஒன்றும், இரண்டு பென்ஸ் ரக மகிழுந்துகளும், 18 இலட்சத்து 50 ஆயிரம் ரூபாய் பெறுமதியான தலா இரண்டு வங்கிக்கடன்களை அவர் பெற்றுள்ளதாக ஆணைக்குழு அறிவித்துள்ளது.
- சஜித்தின் சொத்து விபரங்கள்
ஜனாதிபதித் தேர்தலில் போட்டியிடும் எதிர்க்கட்சித் தலைவர் சஜித் பிரேமதாசவின் சொத்து விபர அறிக்கையின் படி, சகல கொடுப்பனவுகளுடன் மாதாந்த வருமானமாக 2 ,லட்சத்து 95 ஆயிரத்து 681 ரூபா 14 சதத்தைப் பெறுவதாக அறிவிக்கப்பட்டுள்ளது.
தமது மனைவியின் அழகுக்கலை நிலையத்திற்காக ஒரு கோடியே 37 ,லட்சத்து 68 ஆயிரத்து 532 ரூபாய் 75 சதத்தை முதலீடு செய்துள்ளார்.
கஹம்பிலியவெடிய பகுதியில் காணியொன்றும், தமது மனைவிற்கு 23 ,லட்சம் ரூபாய் பெறுமதியான நகைகள் மற்றும் ஒரு பென்ஸ் ரக மகிழுந்தும் லேன்ட் குரூஷர், ப்ராடோ ரக வாகனங்கள் உள்ளிட்ட 5 வாகனங்கள் உள்ளதாகவும் குறிப்பிடப்பட்டுள்ளது.
- அனுரவின் சொத்து விபரங்கள்
தேசிய மக்கள் சக்தியின் ஜனாதிபதி வேட்பாளர் அனுர குமார திஸாநாயக்க மாதாந்த வேதனமாக 54 ஆயிரத்து 285 ரூபாவை பெறுவதாக கையூட்டல் மற்றும் ஊழல் விசாரணை ஆணைக்குழு தெரிவித்துள்ளது.
அவருடைய கூடிய மாதாந்த வருமானம் 2 ,லட்சத்து 2ஆயிரத்து 571ரூபாய் 34 சதமாகும்.
தமது மனைவி தொழில் எதனையும் புரியவில்லை எனவும் அவரிடம் சில தங்க நகைள் உள்ளதாகவும் ஒரு வாகனத்தை மாத்திரம் பயன்படுத்துவதாகவும் பத்தரமுல்லையிலுள்ள வீடு அவரது சொந்தமான வீடு எனவும் தெரிவிக்கப்படுகிறது.
