நடிகர் பசுபதி கதையின் நாயகனாக முதன்மையான வேடத்தில் நடித்திருக்கும் ‘தண்டட்டி’ எனும் திரைப்படத்தின் வெளியிட்டு திகதி அதிகாரப்பூர்வமாக அறிவிக்கப்பட்டிருக்கிறது.
அறிமுக இயக்குநர் ராம் சங்கையா இயக்கத்தில் தயாராகி இருக்கும் முதல் திரைப்படம் ‘தண்டட்டி’. இதில் பசுபதி, ரோகிணி, விவேக் பிரசன்னா, அம்மு அபிராமி உள்ளிட்ட பலர் நடித்திருக்கிறார்கள்.
மகேஷ் முத்துசாமி ஒளிப்பதிவு செய்திருக்கும் இந்த திரைப்படத்திற்கு கே. எஸ். சுந்தரமூர்த்தி இசையமைத்திருக்கிறார். தமிழக கிராம பகுதிகளில் முதிய பெண்மணிகள் காதில் அணிந்திருக்கும் பிரத்யேக ஆபரணமான தண்டட்டி எனும் தங்க நகையை மையப்படுத்தி தயாராகி இருக்கும் இந்த திரைப்படத்தை பிரின்ஸ் பிக்சர்ஸ் எனும் பட நிறுவனம் சார்பில் தயாரிப்பாளர் எஸ். லக்ஷ்மண் குமார் தயாரித்திருக்கிறார்.
இப்படத்தின் இசை மற்றும் முன்னோட்டம் வெளியாகி பாரிய வரவேற்பை பெற்று வரும் நிலையில், வெளியிட்டு திகதி அதிகாரப்பூர்வமாக அறிவிக்கப்பட்டிருக்கிறது. அந்த வகையில் இந்த திரைப்படம் ஜூன் 23ஆம் திகதியன்று உலகம் முழுவதும் படமாளிகையில் வெளியாகிறது.
இதனிடையே ‘தண்டட்டி’ படத்தின் கதையும், ஏற்கனவே தயாராகி விரைவில் வெளியாக இருக்கும் ‘அண்டாவ காணோம்’ எனும் திரைப்படத்தின் கதையும் ஒன்றுதான் என்றும், அதனால் ‘தண்டட்டி’ படத்தை வெளியிடுவதற்கு தடை விதிக்க வேண்டும் என்றும் ‘அண்டாவ காணோம்’ பட தயாரிப்பாளர் ஜே எஸ் கே சதீஷ் குமார் புகார் ஒன்றை தெரிவித்திருக்கிறார். இதனால் ‘தண்டட்டி ‘படத்தின் கதையைத் தெரிந்து கொள்ள ரசிகர்கள் பேரார்வம் காட்டி வருகிறார்கள் என்பது குறிப்பிடத்தக்கது.
