இத்தாலியில் ஏற்பட்ட மண்சரிவில் சிக்கி 8 பேர் உயிரிழந்துள்ளனர் என அதிகாரிகள் தெரிவித்துள்ளனர்.
இத்தாலி இஷியா தீவில் உள்ள காசாமிச்சியோலா நகரில் கடந்த 2 தினங்களாக கடும்மழை பெய்து வருகின்றது. இதன் காரணமாக நேற்று (நவ. 26) அங்கு பாரிய மண்சரிவு ஏற்பட்டுள்ளது. இதில் வீடுகள் உட்பட பல கட்டிடங்கள் மண்ணோடு மண்ணாக புதைந்துள்ளதுடன் பெண்கள், சிறுவர்கள் உட்பட பலர் உயிரோடு புதைந்துள்ளனர்.
இதையடுத்து அங்கு உடனடியாக மீட்பு பணிகள் முடுக்கிவிடப்பட்டன. பொலிஸார், தீயணைப்பு வீரர்கள் மற்றும் பேரிடர் மீட்பு குழுவினர் தீவிர மீட்பு பணிகளில் ஈடுபட்டனர். எனினும் 8 பேரை பிணமாகத்தான் மீட்டுள்ளனர்.
மேலும் ஒரு குழந்தை உட்பட 13 பேர் காணாமல் போயுள்ளதாக கூறப்படுகிறது. இதனால் பலி எண்ணிக்கை மேலும் அதிகரிக்கும் என அஞ்சப்படுகிறது. எனினும் மாயமானவர்களை தேடும் பணியில் மீட்பு குழுவினர் முழு வீச்சில் ஈடுபட்டுள்ளனர்.
