இங்கிலாந்துக்கு எதிரான கடைசி டெஸ்ட் போட்டியில் நியூசிலாந்து இமாலய இலக்கை நிர்ணயிக்கும் வாய்ப்பு ஏற்பட்டுள்ளது.
நியூசிலாந்து – இங்கிலாந்து அணிகள் இடையிலான கடைசி மற்றும் 3ஆவது டெஸ்ட் கிரிக்கெட் போட்டி ஹாமில்டன் நகரில் நடைபெற்று வருகிறது.
இதில் முதலில் துடுப்பெடுத்தாடிய நியூசிலாந்து அணிக்கு ரொம் லேதம், வில் யங் ஜோடி சிறப்பான தொடக்கம் அமைத்துக் கொடுத்தது.
- 3 ஓவர்களில் 105 ஓட்டங்கள் சேர்த்த இந்த ஜோடியை கஸ் அட்கின்சன் பிரித்தார். வில் யங் 92 பந்துகளில், 10 பௌண்டரிகளுடன் 42 ஓட்டங்கள் எடுத்த நிலையில் ஆட்டமிழந்தார்.
தனது 31ஆவது அரைச் சதத்தை கடந்த ரொம் லேதம் 135 பந்துகளில், 9 பௌண்டரிகளுடன் 63 ஓட்டங்கள் சேர்த்த நிலையில் மேத்யூ பாட்ஸ் பந்துவீச்சில் வெளியேறினார்.
இதன் பின்னர் நியூசிலாந்து அணி சீரான இடைவெளியில் விக்கெட்களை பறிகொடுத்தது. கேன் வில்லியம்சன் 44, ரச்சின் ரவீந்திரா 18, டேரில் மிட்செல் 14, ரொம் பிளண்டெல் 21, கிளென் பிலிப்ஸ் 5, மேட் ஹன்றி 8. ரிம் சௌதி 23 ஓட்டங்களில் ஆட்டமிழந்தனர். ஒருபுறம் விக்கெட் வீழ்ந்தாலும் அதிரடியாக விளையாடி அரைச்சதம் அடித்தார் மிட்செல் சாண்ட்னர்.
முதல் நாள் ஆட்டத்தின் முடிவில் நியூசிலாந்து அணி 82 ஓவர்களில் 9 விக்கெட்கள் இழப்புக்கு 315 ஓட்டங்கள் குவித்தது. மிட்செல் சாண்ட்னர் 54 பந்துகளில், 2 சிக்ஸர்கள், 7 பௌண்டரிகளுடன் 50 ஓட்டங்களும், வில் ஓ’ரூர்க் ஓட்டம் ஏதும் எடுக்காமலும் களத்தில் இருந்தனர்.
இங்கிலாந்து அணி சார்பில் மேத்யூ பாட்ஸ், கஸ் அட்கின்சன் ஆகியோர் தலா 3 விக்கெட்களையும், பிரை டன் கார்ஸ் 2 விக்கெட்களையும் கைப்பற்றினர்.
கைவசம் ஒரு விக்கெட் இருக்க 2ஆவது நாள் ஆட்டத்தை தொடர்ந்து விளையாடிய நியூசிலாந்து அணி 347 ஓட்டங்களுக்கு சகல விக்கெட்களையும் இழந்தது. பதிலுக்குத் துடுப்பெடுத்தாடிய இங்கிலாந்து அணி முதல் இன்னிங்ஸில் 143 ஓட்டங்களுக்கு சுருண்டது.
இதனையடுத்து நியூசிலாந்து அணி இரண்டாவது இன்னிங்ஸில் 3 விக்கெட்கள் இழப்புக்கு 136 ஓட்டங்கள் எடுத்து விளையாடி வருகிறது.
அத்தோடு, இங்கிலாந்து அணியைவிட 340 ஓட்டங்கள் முன்னிலை பெற்றுள்ளது. இதனால் நியூசிலாந்து அணி இமாலய இலக்கை நிர்ணயிக்கும் வாய்ப்பு ஏற்பட்டுள்ளது.
