ஜப்பானை வீழ்த்தி இறுதிக்கு முன்னேறியது இந்திய அணி

மகளிர் ஜூனியர் ஆசிய கிண்ண ஹொக்கி போட்டித் தொடரில் ஜப்பானை வீழ்த்தி இந்திய அணி இறுதிப் போட்டிக்கு முன்னேறியது.

9ஆவது மகளிர் ஜூனியர் ஆசிய கிண்ண போட்டி (21 வயதுக்குட்பட்டோர்) ஓமன் தலைநகர் மஸ்கட்டில் நடைபெற்று வருகிறது.

இதில் பங்கேற்றுள்ள 10 அணிகள் இரு பிரிவாக பிரிக்கப்பட்டு லீக்கில் மோதின. லீக் சுற்று முடிவில் ‘ஏ’ பிரிவில் சீனா (4 வெற்றியுடன் 12 புள்ளி) முதலிடமும், இந்தியா (3 வெற்றி, ஒரு தோல்வியுடன் 9 புள்ளி) 2ஆவது இடமும், ‘பி’ பிரிவில் ஜப்பான் (12 புள்ளி) முதலிடமும், தென் கொரியா (9 புள்ளி) 2ஆவது இடமும் பிடித்து அரையிறுதிக்கு முன்னேறின.

இதில் முதலாவது அரையிறுதியில் நடப்பு சம்பியன் இந்திய அணி, ஜப்பானை எதிர்கொண்டது. விறுவிறுப்பாக நடைபெற்ற இந்த ஆட்டத்தில் இந்திய அணி 3 – 1 என்ற கோல் கணக்கில் ஜப்பானை வீழ்த்தி இறுதிப்போட்டிக்கு முன்னேறியது.