அமெரிக்காவின் வரி விதிப்பு நடவடிக்கைகளுக்கு சீனா கடும் எதிர்வினையாற்றியுள்ளது.
ஏப்ரல் 2ஆம் திகதிமுதல், அமெரிக்க பொருட்களுக்கு எந்தெந்த நாடுகளில் எந்தளவுக்கு வரி விதிக்கப்பட்டுள்ளதோ அதேபாணியில், அமெரிக்காவிலும் வெளிநாட்டு பொருட்கள் மீது வரி விதிக்கப்படும் என்று அமெரிக்க ஜனாதிபதி டொனால்ட் ட்ரம்ப் அறிவித்துள்ள நிலையில், அமெரிக்கா மீது உலக நாடுகள் பதில் நடவடிக்கைகளை தொடங்கியுள்ளன.
இதனால், கடும் பொருளாதார நெருக்கடியை எதிர்கொள்ள அமெரிக்கா தயாராகிவரும் சூழலில், ட்ரம்ப்பை கண்டித்து அந்த நாடு முழுவதும் உள்ள பல்வேறு நகரங்களில் மக்கள் ஆயிரக்கணக்கில் திரண்டு மாபெரும் போராட்டத்தில் ஈடுபட்டனா்.
இந்த நிலையில், சீன அரசு அமெரிக்காவின்
நடவடிக்கைகளை கடுமையான வார்த்தைகளால் விமர்சித்துள்ளது.
அமெரிக்காவின் வரி விதிப்பு நடவடிக்கை குறித்து சீன வெளியுறவு அமைச்சரக செய்தித்தொடர்பாளர் இன்று செய்தியாளர்களுடன் பேசுகையில்:
“தங்கள் நாட்டின் பாதுகாப்பை உறுதிசெய்ய பிற நாடுகள் மீது வரி திணிப்பு மற்றும் பொருளாதார சர்வாதிகாரத்தனமான மனப்பான்மையுடன் பிற நாடுகளை மிரட்டும் தன்னிச்சையான நடவடிக்கை இது” என்று குறிப்பிட்டு விமர்சித்துள்ளார்.
சீனா தமது உரிமைகளையும் விருப்பங்களையும் உறுதித்தன்மையுடன் பாதுகாக்குமென்றும், சீனாவுடன் உறவை கடைப்பிடிக்க அழுத்தமும் மிரட்டல் விடுக்கும் பாணியையும் கையிலெடுத்தல் அது வேலைக்காகாது என்றும் குறிப்பிட்டுள்ளார்.
சீன பொருள்கள் மீது ட்ரம்ப் அறிவித்துள்ள 34 சதவீத பரஸ்பர வரி விதிப்புக்கு பதிலடியாக, அமெரிக்காவின் அனைத்து பொருள்கள் மீதும் 34 சதவீத கூடுதல் வரி விதிப்பை சீனா தற்போது அறிவித்துள்ளது குறிப்பிடத்தக்கது………………
