நுவரெலியாவில் இனங்காணப்பட்ட சிறுத்தைப் புலி!

நுவரெலியா – ஹட்டன் பொலிஸ் பிரிவிற்குட்பட்ட டிக்கோயா வனராஜா சம்வீல் தோட்டப் பகுதியில் உள்ள மரம் ஒன்றில் சிறுத்தை புலி ஒன்று உயிருடன் இனங்காணபட்டுள்ளதாக, ஹட்டன் பொலிஸார் தெரிவித்துள்ளனர். ஆறு அடி நீளம் கொண்ட குறித்த சிறுத்தை புலி மரம் ஒன்றில் இருப்பதை இன்று காலை இனங்கண்ட பொதுமக்கள், ஹட்டன் பொலிஸாருக்கு தகவல் வழங்கியுள்ளனர். அதனை அடுத்து குறித்த இடத்திற்கு வருகைதந்த ஹட்டன் பொலிஸார், சிறுத்தை புலியினை மீட்பதற்காக நல்லதண்ணி வனவிலங்கு அதிகாரிகளுக்கு தகவல் வழங்கியுள்ளனர். குறித்த பகுதியில் இனந்தெரியாதவர்களாள் விரிக்கப்பட்ட வலையில் இந்த சிறுத்தை புலி மாட்டிகொண்டு மரத்தில் ஏறியுள்ளதாக பொலிஸாரின் ஆரம்பகட்ட விசாரணைகளில் இருந்து தெரியவந்துள்ளது. மரத்தில் ஏறிய சிறுத்தை புலியினை மீட்க நல்லதண்ணி வனவிலங்கு அதிகாரிகள் மற்றும் பொலிஸார் நடவடிக்கை எடுத்து வருகின்றமை குறிப்பிடத்தக்கது.