மட்டக்களப்பு மாவட்ட விவசாயத்திணைக்களத்திற்கு உட்பட்ட மண்முனை தென்மேற்கு, கொக்கட்டிச்சோலை விவசாய விரிவாக்கத் நிலையத்திற்குட்பட்ட மாவடிமுன்மாரி விவசாயப் போதனாசிரியர் பிரிவில் சேதன முறையிலான வீட்டுத்தோட்ட களப் பாடசாலை நிகழ்வின் அறுவடை விழா இன்று நடைபெற்றது.
மாவடிமுன்மாரி விவசாயப் போதனாசிரியர் பிரிவிற்கு பொறுப்பான தொழில்நுட்ப உத்தியோகத்தர் சு.துஷாந் தலைமையில் இடம்பெற்ற இந்நநிகழ்வில் மட்டக்களப்பு மாவட்ட பிரதி விவசாயப் பணிப்பாளர் மு.பரமேஸ்வரன், தெற்கு வலய உதவி விவசாயப் பணிப்பாளர் நித்யா நவரூபன், வலய மத்தி உதவி விவசாய பணிப்பாளர் எஸ்.சித்திரவேல் பாடவிதான உத்தியோகத்தர் திரு.என்.லட்ஸ்மன், தெற்கு வலய விவசாயப் போதனாசிரியர்கள், தொழில்நுட்ப உத்தியோகத்தர்கள்,விவசாயிகள் என பலரும் கலந்து கொண்டிருந்தனர்.
இயற்கை முறையில் வீட்டுத் தோட்டத்தை செய்கை பண்ணும் முறைமைகள், நாற்று மேடை முதல் அறுவடை வரையில் எவ்வாறான தொழில்நுட்பங்கள் பயன்படுத்த வேண்டும் போன்ற செயன்முறை ரீதியான பயிற்சிகள் 12 வாரங்கள் தொடர்ச்சியாக நடைபெற்றிருந்தது. அதன் இறுதி நாளில் சேதன மரக்கறிகள் அறுவடை செய்யப்பட்டதோடு, விவசாயிகளுக்கான உள்ளீடுகளும் வழங்கப்பட்டன.
