போல் ஸ்டேர்லிங், கேர்ட்டிஸ் கெம்ஃபர் ஆகிய இருவரும் குவித்த கன்னிச் சதங்களின் பலனாக இலங்கைக்கு எதிரான 2ஆவதும் கடைசியுமான டெஸ்ட் போட்டியில் அயர்லாந்து 492 ஓட்டங்களைக் குவித்து சாதனை படைத்தது.
டெஸ்ட் கிரிக்கெட் போட்டி ஒன்றில் அயர்லாந்து குவித்த அதிகூடிய மொத்த எண்ணிக்கை இதுவாகும்.
பாகிஸ்தானுக்கு எதிராக 2018இல் நடைபெற்ற அங்குரார்ப்பண டெஸ்ட் போட்டியில் அயர்லாந்து குவித்த 339 ஓட்டங்களே இதற்கு முன்னர் அவ்வணியின் அதிகூடிய டெஸ்ட் மொத்த எண்ணிக்கையாக இருந்தது.
காலி சர்வதேச கிரிக்கெட் விளையாட்டரங்கில் நடைபெற்றுவரும் இந்த டெஸ்ட் போட்டியின் இரண்டாம் நாளான இன்று செவ்வாய்க்கிழமை (25) பிற்பகல் 4.30 மணியளவில் போதிய வெளிச்சம் இன்மை காரணமாக ஆட்டம் நிறுத்தப்பட்ட போது இலங்கை அதன் முதல் இன்னிங்ஸில் விக்கெட் இழப்பின்றி 81 ஓட்டங்களைப் பெற்றிருந்தது.
