யாழ்ப்பாணம் ஊர்காவற்றுறை பொலிஸ் பிரிவுக்குட்பட்ட குறிகட்டுவான் இறங்குதுறையில் இருந்து, கட்டுமானப் பொருட்களை ஏற்றிச் சென்ற படகு, கட்டுப்பாட்டை இழந்து கவிழ்ந்ததில், ஒருவர் உயிரிழந்துள்ளார்.
படகில் நான்கு பேர் பயணித்த நிலையில், ஒருவர் உயிரிழந்துள்ளதுடன், ஏனைய மூவரும், நீந்திக் கரை சேர்ந்துள்ளனர்.இவ்வாறு கரை சேர்ந்தவர்களில் காயமடைந்த ஒருவர், யாழ்ப்பாணம் போதனா வைத்தியசாலையில் சிகிச்சை பெற்று வருகின்றார்.
கட்டுமானப் பொருட்களை ஏற்றியவாறு, குறிகட்டுவான் இறங்குதுறையில் இருந்து நயினாதீவு நோக்கி பயணித்த படகே, இவ்வாறு விபத்திற்குள்ளானது.
இந்த சம்பவத்தில், இரண்டு பிள்ளைகளின் தந்தையான, புங்குடுதீவு மூன்றாம் வட்டாரத்தைச் சேர்ந்த, 42 வயதான இந்திரலிங்கம் அருண் உயிரிழந்த நிலையில், சடலம், யாழ்ப்பாணம் போதனா வைத்தியசாலைக்கு கொண்டுவரப்பட்டது.
இந்த நிலையில், ஊர்காவற்றுறை பொலிசார், மேலதிக விசாரணைகளை மேற்கொண்டு வருகின்றனர்.
