வெலிக்கடைச் சிறைச்சாலையில் ஆறு பேருக்கு கொரோனா வைரஸ் பரிவியிருப்பது உறுதிப்படுத்தப்பட்டுள்ளது.

சிறைச்சாலை மருத்துவப் பணியாளர் ஒருவருக்கு கொரோனா உறுதிப்படுத்தப்பட்டதையடுத்து சிறைக் கைதிகளுக்கு பி.சி.ஆர். பரிசோதனை மேற்கொள்ளப்பட்டது.

இதன்போதே ஐந்து பெண் கைதிகள் உட்பட ஆறு பேருக்கு கொரோனா தொற்றிருப்பது உறுதிப்படுத்தப்பட்டுள்ளது.

கொரோனா தொற்றிலிருந்து நாடும், நாட்டு மக்களும் விடுபட வேண்டி, யாழ்ப்பாணம் பாணங்குளம் நாச்சியம்மன் ஆலயத்தில் யாழ்.மாவட்டச் செயலக கலாசார பிரிவின் ஏற்பாட்டில் இன்றுகாலை சிறப்பு பூசைவழிபாடுகள் இடம்பெற்றன.

பிரதமரின் வழிகாட்டுதலின் கீழ் புத்தசாசன மற்றும் கலாசார அலுவல்கள் அமைச்சின் அறிவுறுத்தலுக்கமைய மக்கள் அனைவரும் கொரோனா வைரஸ் தாக்கத்திலிருந்து மீள அருளாசி வேண்டி, நாடு முழுவதிலுமுள்ள இந்து ஆலயங்களில் விஷேட பிரார்த்தனை வழிபாடுகள் இடம்பெற்று வருகின்றன.

அந்தவகையில் யாழ். மாவட்டச் செயலக கலாசார பிரிவின் ஏற்பாட்டில் யாழ்ப்பாணம் பாணங்குளம் நாச்சியம்மன் ஆலயத்தில் இன்று காலை விஷேட வழிபாடு நடத்தப்பட்டது. இந்த வழிபாட்டில் யாழ். மாவட்ட மேலதிக அரசாங்க அதிபர் ம.பிரதீபன், மாவட்ட செயலக கலாசார அலுவல்கள் திணைக்கள உத்தியோகத்தர்கள் கலந்து கொண்டனர்.

யாழ். மாவட்டத்தில் தற்போதுள்ள சுகாதார நடைமுறைகளுக்கு ஏற்ப மட்டுப்படுத்தப்பட்டவர்களுடன் இந்த பூசை வழிபாடுகள் இடம்பெற்றன.

நாட்டின் பெரும்பாலான பகுதிகளில் பிற்பகல் வேளையில் இடியுடன் கூடிய மழை பெய்யக்கூடிய சாத்தியம் அதிகமாகக் காணப்படுவதாக யாழ்ப்பாணம் பிராந்திய வளிமண்டல ஆராய்ச்சி திணைக்களப் பொறுப்பதிகாரி ரி.பிரதீபன் தெரிவித்துள்ளார்.

காலநிலை மாற்றம் தொடர்பில் இன்று கருத்துத் தெரிவிக்கும் போதே அவர் இவ்வாறு தெரிவித்தார்.

அவர் மேலும் தெரிவித்தவை வருமாறு:

நாட்டின் பெரும்பாலான பகுதிகளில் நிலவும் வளிமண்டல தளம்பல் நிலையால் பிற்பகல் வேளையில் இடியுடன் கூடிய மழை பெய்யக்கூடிய சாத்தியம் அதிகமாகக் காணப்படுகின்றது.

கிழக்கு மாகாணத்திலும், முல்லைத்தீவு மாவட்டத்திலும் கரையோர பிரதேசத்தில் மழை பெய்யக்கூடிய சாத்தியம் காணப்படுகின்றது.

மத்திய, வடமத்திய, ஊவா, வடமேல், சப்ரகமுவ மற்றும் தென் மாகாணங்களில் சில இடங்களில் 100 மில்லி மீற்றருக்கும் அதிக மழைவீழ்ச்சி எதிர்பார்க்கப்படுகின்றது.

மழை பெய்யும் வேளைகளில், இடிமின்னல் தாக்கத்தால் ஏற்படும் இழப்புக்களைக் குறைப்பதற்கான முன்னேற்பாட்டு நடவடிக்கைகளை மேற்கொள்ளுமாறு பொதுமக்களை அறிவுறுத்துகின்றோம். அதேவேளை காற்றின் வேகமும் அதிகரிக்கக்கூடிய சூழ்நிலை காணப்படுகிறது.

கடந்த 4ஆம் திகதி காலை 8.30 மணியிலிருந்து 5ஆம் திகதி காலை 8.30 மணிவரை, யாழ்ப்பாணம், திருநெல்வேலி பகுதியில் 11.1 மில்லி மீற்றர் மழை வீழ்ச்சியும், அச்சுவேலிப் பகுதியில் 8.3 மி.மீ மழை வீழ்ச்சியும், பருத்தித்துறைப் பகுதியில் 4.8 மி.மீ மழை விழ்ச்சியும், கோட்டைப் பகுதியில் 0.8 மி.மீ மழை வீழ்ச்சியும், நெடுந்தீவுப் பகுதியில் 7.0 மி.மீ மழை வீழ்ச்சியும், சாவகச்சேரி பகுதியில் 4.9 மி.மீ மழை வீழ்ச்சியும், யாழ்ப்பாணம் பகுதியில் 12.6 மி.மீ மழை வீழ்ச்சியும், தெல்லிப்பழைப் பகுதியில் 0.7 மி.மீ மழை வீழ்ச்சியும், முல்லைத்தீவு ஒட்டுசுட்டான் பகுதியில் 9.8 மி.மீ மழை வீழ்ச்சியும், கிளிநொச்சி ஆனையிறவுப் பகுதியில் 10.0 மி.மீ மழை வீழ்ச்சியும், அக்கராயன் பகுதியில் 8.0 மி.மீ மழை வீழ்ச்சியும் மற்றும் பதிவாகியுள்ளது.

கடந்த வருடத்தை விட இந்த வருடம் மழை வீழ்ச்சி குறைவாகவே காணப்படுகின்றது. எமது நாட்டில் பொதுவாக ஒக்ரோபர், நவம்பர் மாதங்களில் மழை வீழ்ச்சி அதிகமாகக் காணப்படும்.

இந்த வருடம் ஒக்ரோபர் மாதத்தில் மிகக் குறைவாக 23.3 மி.மீ மழை வீழ்ச்சியே பதிவாகியுள்ளது. அது மாத்திரமின்றி நவம்பர் மாதத்திலும் குறைந்த மழை வீழ்ச்சியே எதிர்பார்க்கப்படுகின்றது.இதேவேளை டிசெம்பர் மாதக் காலப்பகுதியில் ஓரளவு மழை வீழ்ச்சியை எதிர்பார்க்கலாம் எனத் தெரிவித்தார்.

பாடசாலைகளை மூடியதன் விளைவு, குழந்தைகளின் கல்வியில் பல ஆண்டுகளுக்குத் தாக்கம் செலுத்தக்கூடும் என ஜனாதிபதி கோட்டாபய ராஜபக்ஷ தெரிவித்துள்ளார்.

ஜனாதிபதி செயலகத்தில் நேற்று இடம்பெற்ற கொரோனா ஒழிப்பு ஜனாதிபதி செயலணிக் கூட்டத்தில் உரையாற்றும் போதே ஜனாதிபதி இவ்வாறு சுட்டிக்காட்டினார்.

இந்தச் செயலணிக்கூட்டத்தில் ஜனாதிபதி மேலும் தெரிவித்தவை வருமாறு:

கொரோனா வைரஸ் தொற்று சுகாதாரம், பொருளாதார மற்றும் சமூக ரீதியாக, முழு உலகிலும் பல விதங்களில் தாக்கங்களை ஏற்படுத்தியுள்ளது.

இலங்கையில் முதல் கொரோனா தொற்றுக்குள்ளாகிய நபரை கடந்த மார்ச் மாதம் அடையாளம் கண்ட நாளிலிருந்து, மக்களின் பாதுகாப்பிற்காக ஒரு அரசாங்கமாக பல்வேறு நடவடிக்கைகளை எடுத்துள்ளோம்.

இருப்பினும், இத்தொற்று கிருமிக்கு எதிராக நிரந்தர சிகிச்சை(மருந்து) இதுவரை கண்டுபிடிக்கப்படாத நிலையில், நாம் இனி நாட்டை முற்றாக மூடிவிட்டு மக்களின் அன்றாட வாழ்க்கையைப் பாதிக்க முடியாது.

பாடசாலைகளை மூடியதன் விளைவு குழந்தைகளின் கல்வியில், பல ஆண்டுகளுக்குத் தாக்கம் செலுத்தக்கூடும். மேலும், அன்றாடம் தொழில் செய்பவர்கள் மற்றும் வர்த்தக
சமூகத்தினர் மீது கொரோனா பாரியளவில் தாக்கத்தை செலுத்தியுள்ளது.

எனவே, இந்தச் சந்தர்ப்பத்தில் இலங்கையர்களாகிய நாம் அனைத்து அரசியல் சித்தாந்தங்களையும் வேறுபாடுகளையும் களைந்து நாட்டின் முன்னேற்றத்துக்காக ஒன்றுபட வேண்டும்.

சுய ஒழுக்கத்தைக் கடைப்பிடிப்பதன் மூலம், நல்ல சுகாதாரப் பழக்கவழக்கங்களையும் வழிகாட்டுதல்களையும் பின்பற்றுவதன் மூலம், கொரோனாவைத் தோற்கடிக்க முடியும் என ஜனாதிபதி தெரிவித்தார்.