சிறுவர் பாதுகாப்பு தொடர்பில் கடந்த இரண்டு ஆண்டுகளில் கிடைக்கப்பெற்ற முறைப்பாடுகளில் 47 சதவீதமான முறைப்பாடுகளுக்கு இன்னும் தீர்வு வழங்கப்படவில்லையென கணக்காய்வு அறிக்கையின் மூலம் தெரியவந்துள்ளது.
சிறுவர் பாதுகாப்பு அதிகார சபைக்கு கடந்த இரண்டு ஆண்டுகளில் (2021-2022) கிடைக்கப்பெற்ற சிறுவர் பாதுகாப்பு தொடர்பான 10 ஆயிரத்து 691 முறைப்பாடுகளில் 47 சதவீதமான முறைப்பாடுகளுக்கு இன்னும் தீர்வு வழங்கப்படவில்லையென தேசிய கணக்காய்வு அலுவலகத்தினால் மேற்கொள்ளப்பட்ட தணிக்கையில் தெரிவிக்கப்பட்டுள்ளது.
அதனடிப்படையில் சிறுவர் பாதுகாப்பு தொடர்பில் புலனாய்வுப் பிரிவு, மனநலப் பிரிவு, சட்டப் பிரிவு ஆகியவற்றுக்குக் கிடைத்த முறைப்பாடுகளில் 50 சதவீதத்துக்கும் அதிகமானவை இன்னும் விசாரணையில் இருப்பதாகவும் அவ்வறிக்கை மூலம் தெரியவந்துள்ளது.
மேலும், கடந்த 2022 ஆம் ஆண்டில் சிறுவர் துஷ்பிரயோகம் மற்றும் வன்முறைகள் தொடர்பாக 10 ஆயிரத்து 497 முறைப்பாடுகள் கிடைக்கப்பெற்ற போதிலும், கடந்த ஆண்டு இறுதிக்குள் ஆறாயிரத்து 731 துஷ்பிரயோகங்கள் தொடர்பாக இறுதி நடவடிக்கைகள் எதுவும் எடுக்கப்படவில்லை என கணக்காய்வு அறிக்கையில் குறிப்பிடப்பட்டுள்ளது.
இதேவேளை சிறுவர் பாதுகாப்பு அதிகாரசபையின் அங்கீகரிக்கப்பட்ட ஊழியர்களின் எண்ணிக்கை 618 ஆக இருந்தாலும், 287 ஊழியர்களின் ( 46% ) பதவிகளுக்கு வெற்றிடங்கள் காணப்படுகின்றன.
கடந்த இரண்டரை வருடங்களாக சிறுவர் துஷ்பிரயோகத்தில் முக்கிய பங்காற்றும் 148 சிறுவர் பாதுகாப்பு உத்தியோகத்தர்களின் பதவியிடங்கள் வெற்றிடமாக உள்ள நிலையில், அதிகார சபையின் பணிகளை முறையாக மேற்கொள்ள முடியவில்லையென தெரியவந்துள்ளது.
கடந்த அக்டோபர் 29, 2019 அன்று அங்கீகரிக்கப்பட்ட குழந்தைகள் பாதுகாப்புக்கான தேசியக் கொள்கையை செயல்படுத்துவது தொடர்பான ஐந்தாண்டு செயல் திட்டத்திற்கு அமைச்சர்கள் குழுவின் ஒப்புதலைப் பெற எந்த நடவடிக்கையும் எடுக்கப்படவில்லை.
முறைப்பாட்டின் விசாரணைப் பணிகள் அல்லது நடவடிக்கைகள் நிறைவடையாத காரணத்தினால், அது தொடர்பான முறைப்பாடுகள் மூடிய முறைப்பாடுகளாகக் கருதப்படுவதில்லை எனவும், மேலும் விசாரணையின் கீழ் முறைப்பாடுகளாக முன்வைக்கப்படுவதாகவும் அவர்கள் மேலும் குறிப்பிட்டுள்ளனர்.
மேலும் வெற்றிடமாகவுள்ள 287 பணியிடங்களில் 17 பணியிடங்களுக்கு ஆட்சேர்ப்பு செய்வதற்கான விண்ணப்பங்கள் கோரப்பட்டுள்ளதாக அதிகார சபையின் நிர்வாகம் கணக்காய்வு அலுவலகத்துக்கு குறிப்பிட்டுள்ளது.
சிறுவர் பாதுகாப்புக்கான ஐந்தாண்டுத் திட்டத்தின் இறுதிக் கட்டம் தற்போது அமைச்சரவைக்கு அனுப்பிவைக்கப்பட உள்ளதாகவும், தேசிய சிறுவர் பாதுகாப்பு அதிகாரசபை தொடர்பான 2022ஆம் ஆண்டு தொடர்பாகவும் அமைச்சரவைக்கு அனுப்பிவைக்கப்பட உள்ளதாகவும் கணக்காய்வு அலுவலகம் தெரிவித்துள்ளது.
